Kviknes Hotel - Gjestfridom i fire generasjonar

På Kviknes Hotel strekkjer gjestgjevar-tradisjonane seg tilbake til 1752. Familien Kvikne som i dag eig hotellet, overtok i 1877. Hotellet vart reist i sveitserstil. Mange nybyggingar, ombyggingar og utvidingar har ikkje gått ut over særpreget til staden. Kviknes er eit moderne hotell med sjel og atmosfære, og er med sine 190 rom eitt av dei største turisthotella i Noreg. Hotellet har samla ei mengde kunstverk og klenodium som pregar hotellet og gjev det sin spesielle stil.

Lista over prominente gjester er svært lang. Keisar Wilhelm II av Tyskland var ofte gjest i Balestrand. Kongelege, keisarar, presidentar, statsministrar, filmstjerner og kunstnarar frå mange land er å finne på gjestelista.

Pusterom

Ta deg eit lite pusterom ved å rusle gjennom salongane og nyte godt av det den kunstinteresserte og internasjonale hotellfamilien har samla gjennom generasjonar. Nyt naturen, fjella og Sognefjorden frå ein godstol i hotellhagen. Eller du kan gjere som så mange andre som kjem til Balestrand, vandre rett inn i den nasjonalromantiske scena som har inspirert kunstnarar i over hundre år.

Den spesielle atmosfæren på Kviknes Hotel i Balestrand får du på kjøpet!